Wrth i ni ddathlu 10 mlynedd ers sefydlu Ymddiriedolaeth y Dyn Gwyrdd, rydw i, fel Cymro balch, yn dal i deimlo’n angerddol o ymrwymedig i'r sefydliad hwn fel ei Lysgennad. Mae'r Ymddiriedolaeth yn dangos i’r byd pa mor anghredadwy yw Cymru fel gwlad. Mae'n datblygu'r celfyddydau, yn hyrwyddo'r Gymraeg, yn cefnogi cymunedau Cymreig, a'r datblygiadau arloesol sy'n gwneud ein gwlad yn arbennig. Rwyf mor falch o ddweud bod nifer aruthrol o 12,000 o bobl wedi cael eu cefnogi ers i ni ddechrau, a bod y daith ei hun wedi bod yn un wefreiddiol.

Yn y cyfnod dryslyd hwn o anrhefn, mae rôl y Dyn Gwyrdd fel hafan o garedigrwydd a chynwysoldeb yn cael mwy o effaith fyth. Mae gofal wrth wraidd popeth y mae'r elusen yn ei wneud, yn union fel yr ŵyl fyd-enwog y mae’n deillio ohoni. Fel Cymru, mae ei chryfder yn meiddio gwneud pethau'n wahanol i greu newid cadarnhaol a pharchu'r angen i feddwl yn annibynnol.

Mae’r Dyn Gwyrdd bob amser wedi cefnogi ei gymuned. Rhwng 2006 a 2013, rhoddwyd £280,000 i brosiectau cymunedol gan gynnwys adnewyddu Neuadd Bentref Cwm-du, cadw ysgolion cynradd lleol ar agor, a chefnogi sefydliadau chwaraeon ac amgylcheddol a phobl fregus ym Mhowys. Erbyn 2014, roedd prosiectau wedi ennill eu plwyf a chafodd yr Ymddiriedolaeth ei sefydlu.

Wrth gwrs, allwn ni ddim siarad am y Dyn Gwyrdd na'r Ymddiriedolaeth heb sôn am Fiona Stewart neu ‘Fi’ i'w ffrindiau. Mae hi'n poeni am bobl, yn cefnogi cymdeithas decach ac yn creu profiadau sy'n dod â phobl at ei gilydd. Bydd mynychwyr Gŵyl y Dyn Gwyrdd yn gyfarwydd â'r ethos hwn sydd wrth wraidd yr ŵyl a hefyd yr Ymddiriedolaeth.

Ers sefydlu Ymddiriedolaeth y Dyn Gwyrdd, mae artistiaid gweledol, artistiaid perfformio ac artistiaid cerddorol dirifedi wedi defnyddio'r cyfleoedd unigryw y mae’r Dyn Gwyrdd yn eu cynnig i arddangos gwaith gyda dylanwadwyr uchel eu parch, gweithwyr proffesiynol y diwydiant a'r biliynau o ddilynwyr y Dyn Gwyrdd. Yn ystod y pandemig arhosodd yr Ymddiriedolaeth yn gefn iddynt, gan gomisiynu gwaith newydd, eu cysylltu â chynulleidfaoedd a'u tywys trwy heriau. Mae parch at ein hiaith brydferth bob amser yn bresennol ac yn cael ei annog.

Mae'r Ymddiriedolaeth wedi gwneud ymrwymiad i gymunedau Cymru drwy gefnogi pobl fregus a ddioddefodd yn sgil llifogydd Storm Denis, drwy gyfrannu at fanciau bwyd, atgyweirio mannau cymunedol, cefnogi ysgolion, mynd i'r afael â materion iechyd meddwl, a helpu pobl i gadw eu hurddas drwy’r argyfwng costau byw. Ar yr un pryd mae camau i hyrwyddo iechyd a lles a mynd i'r afael â'r argyfwng hinsawdd hefyd yn cael eu cymryd drwy'r rhaglen ymgysylltu â gwyddoniaeth.

Mae safon gwasanaeth, cynnwys, arloesedd a gweithredu’r Dyn Gwyrdd yn chwedlonol ac wedi ennill sawl gwobr. Mae cannoedd o bobl ifanc wedi elwa o raglenni hyfforddi sy’n cael eu cynnal gan yr Ymddiriedolaeth yn ystod yr ŵyl. Gall y profiad drawsnewid bywydau, eu helpu i ddatblygu sgiliau a hyder ac mae'n rhywbeth atyniadol i gyflogwyr yn y dyfodol.

Mae meddylfryd y Dyn Gwyrdd yn fy ysbrydoli i a gwirfoddolwyr eraill nad ydym byth yn eu cymryd yn ganiataol. Hoffem ddiolch i bawb gan gynnwys ein Hymddiriedolwyr Jo Owen, Natasha Hale, Ian Fielder, Dan Langford OBE ac wrth gwrs Jo Rodrigues sy'n rheoli'r Ymddiriedolaeth ac yn dod â'r cyfan at ei gilydd, criw’r Dyn Gwyrdd sy'n hyfforddi cymaint o bobl, a chynulleidfa'r Dyn Gwyrdd sef y gynulleidfa ddelfrydol ac sy’n ein helpu ni i greu gŵyl ddiogel lle mae hyd yn oed y rhai mwyaf agored i niwed yn ffynnu.

Mae cenedlaethau'r dyfodol yn haeddu dyfodol disglair ac mae Ymddiriedolaeth y Dyn Gwyrdd yn gwneud ei rhan. Rwy'n cael fy ysbrydoli gan ei gwaith a'i chenhadaeth, a phenderfynais fel llawer o rai eraill helpu - byddem wrth ein bodd pe gallech chithau ymuno â ni ... er mwyn gwireddu’r pethau da...

Diolch,

Iwan Rheon x